images
   ९ आश्विन २०७६, बिहीबार १४:५५  
image

२७ वर्षीया खगित्रा शाहीले बुधवार एकैपटक चारजना शिशुहरूलाई जन्म दिएको घटनालाई उनको प्रसूतिमा सघाएका काठमाडौं मेडिकल कलेज (केएमसी)का चिकित्सहरूले ‘दुर्लभ’ घटना बताएका छन् । आठ महिनाको गर्भपछि शल्यक्रियामार्फत् जन्माइएका ती शिशुमा तीन छोरा र एक छोरी छन् ।

तीन शिशुको स्वास्थ्य अवस्था सामान्य रहेको तर एक जनाको अवस्था भने अस्थिर देखिएको शल्यक्रियामा संलग्न एकजना नर्स अल्पना अधिकारीले बीबीसीलाई बताइन् । केएमसीकी प्रसूति तथा स्त्रीरोग विशेषज्ञ डा.चन्दा कार्की भन्छिन्, ‘सामान्य तरिकाबाटै बस्ने गर्भमा यस्तो हुनु निकै दुर्लभ हो। मेरो ३५ वर्षे अनुभवमा मैले देखेको यो दोस्रो चम्ल्याहा जन्म हो ।’

‘टेस्टट्युब बेबी’का रूपमा जन्माइने सन्तानका हकमा भने एकभन्दा बढी भ्रूण गर्भमा रहन सक्ने बताइन्छ । बुधवार जन्मिएका शिशुहरू ३४ हप्ता पुगेपछि जन्मिएका कारण ती शिशुहरूलाई श्वासप्रश्वासमा कठिनाइ हुन सक्ने हुँदा केही साता विशेष स्वास्थ्य निगरानीमा राख्नुपर्ने शल्यक्रियामा संलग्न स्वास्थ्यकर्मीहरूले बताएका छन् ।

सामान्यतः नवजात शिशु जन्मँदा साढे दुई किलो तौल हुनुपर्ने मानिन्छ । चौतीस हप्ता पूरा भएपछि फोक्सो पूर्ण रूपमा विकास हुनेगर्छ । ‘तर यसरी जन्मने शिशुमा फोक्सोको विकास हुने काम केही छिटो हुन सक्छ । किनकि ती शिशुहरूले गर्भमै तनावपूर्ण अवस्था बेहोरेर हुर्कने हुँदा तिनको शारीरिक विकासमा परिपक्वता छिट्टै देखिने सम्भावना हुन्छ ।’

जन्मिएका शिशुमध्ये सबैभन्दा कम एक जनाको तौल ९५० ग्राम रहेको छ । बाँकी तीन जनाको क्रमशः झन्डै १३६० ग्राम, १४९५ ग्राम र १६७० ग्राम रहेको चिकित्सकहरूले बताएका छन् । चारवटा बच्चा गर्भमा रहेको भन्ने पहिले नै थाहा भएपछि झन्डै एक महिनाअघि खगित्रा शाहीलाई उनको परिवारले धनगढीबाट काठमाडौं ल्याएको थियो । उनका श्रीमान् पदमबहादुर शाही भन्छन्, ‘पछिल्ला केही साता त उनलाई हिँड्न, उठबस गर्न र खाना खान नै निकै कठिन भएको थियो ।’ तर चिकित्सकहरू भने शिशुका शरीरका

अङ्गहरूको विकासका लागि भन्दै कम्तीमा ३४ साता पुर्याउन जोड दिइरहेका थिए । ‘चौतीसौँ साता पुगेको दिन शल्यक्रिया गरियो’ पदम बहादुर शाहीले भने । पाठेघर निकै तन्कने हुँदा चारवटा शिशुलाई शरीरमा पूरा समय राख्न लगभग असम्भव नै हुने स्त्रीरोग विशेषज्ञ कार्की बताउँछिन् । बीबीसी

च्याउ खाँदा एकै घर परिवारका ९ जना बिरामी

 १६ आश्विन २०७६, बिहीबार २१:३३